Efnisyfirlit

Hvað er módelflug?

Módelflug er nútímaíþrótt fyrir alla fjölskylduna; fræðandi og skemmtilegt tómstundagaman.

Tæknibylting undanfarinna áratuga hefur sett mark sitt á þá þróun sem orðið hefur á þeim rafeinda- og tæknibúnaði sem notaður er til að knýja og stýra smáflugvélum þeim sem í daglegu tali eru kallaðar flugmódel.

Þessi þróun hefur haft það í för með sér að það er nú á hvers manns færi að iðka þessa íþrótt, sem farið hefur sigurför um heiminn.

Flug með fjarstýrðum flugvélum lýtur sömu lögmálum og flug á mannbærum flugvélum. Fjarstýrt flug er því aðeins ein tegund flugs, þar sem flugmaðurinn er einnig áhorfandi, en aldrei farþegi.

Það er útbreiddur misskilningur að þessi tegund flugs sé aðeins fyrir börn og unglinga. Módelflug er fyrir alla sem unna flugi, karla, konur og börn.

Flugmódel eru af ýmsum gerðum, allt frá litlum svifflugum til stórra vélfluga í mælikvarða 1:3. Vænghaf flugmódela á Íslandi er allt að 4 metrar og mótorar eru allt að 6 hestöfl. Sjáið myndasíðurnar sem vísað er í hér á eftir.

Módelflug hentar Íslendingum afar vel. Hér er bjart um sumarnætur til flugs og útiveru í góðra vina hópi, og fátt annað fær dimm og drungaleg vertarkvöld til að líða með ljóshraða eins og að sitja við smíðar á óskaflugvélinni.

Hér er ekkert kynslóðabil. Feður og synir, mæður og dætur vinna saman við smíðar og flug, og njóta þeirrar gleði og ánægju sem flugið eitt getur veitt.

Flugmódelfélagið Þytur.

• Að efla flug á Íslandi, einkum módelflug.
• Að sjá félögum sínum fyrir aðstöðu til módelflugs.
• Að halda uppi öflugu félagsstarfi, sem felst meðal annars í fundum og keppni í hinum ýmsu greinum módelflugs.
• Að sjá félögum sínum fyrir tryggingu gegn tjóni sem módelin gætu valdið.

Keppnir sem Þytur heldur eru samkvæmt alþjóðlegum reglum FAI (Federation Aeronautique Internationale). Keppt er í svifflugi (hástart F3B, hang F3F) og listflugi (F3A). Einnig eru reglulega haldnar lendingakeppnir og flugkomur. Alþjóðleg mót eru stundum haldin á Íslandi, og verður Viking Race í módelsvifflugi haldið í ágústmánuði 1996. Á síðasta Viking Race móti í Skotlandi 1994 voru um 50 keppendur, þar af þrír frá Íslandi.

Upplýsingar um hvað er á döfinni hverju sinni er hægt að fá í símsvara 562 29 10.

Þytur hefur komið upp glæsilegri aðstöðu til módelflugs fyrir sunnan Hafnarfjörð. Á Hamranesflugvelli eru malbikaðar flugbrautir og félagsheimili. Þangað eru gestir og gangandi velkomnir.

Glæsileg flugsýning með flugmódelum jafnt sem stórum vélum verður síðustu helgina í júní 1996 á Hamranesflugvelli.

Stjórn Þyts skipa: Formaður er Arnar B Vignisson. Gjaldkeri er Erlendur Borgþórsson. Ritari er Guðmundur Jónsson. Meðstjórnendur eru Birgir Sigurðsson og Andrés Már Vilhjálmsson.

Á annarri síðu eru fjölmargar spurningar og svör um módelflug. Þar er saman kominn heilmikill fróðleikur fyrir þá sem hafa hug á að prófa þetta skemmtilega tómstundargaman.

Flugsýning á Hamranesflugvelli 2 júlí 1995. - Eftirmáli

Flugsýningin tókst með ágætum, og mættu nokkur hundruð gestir. Til stóð að sýna listflug á "alvöru" flugvélum, en því miður lokaðist Reykjavíkurflugvöllur rétt í þann mund sem atriðið átti að hefjast. Módelflug var í þess stað flogið fram eftir degi. Því miður varð þessi tilfærsla milli daga til þess að ýmsir misstu af sýningunni.

Næsta flugsýning verður væntanlega síðustu helgina í júní 1996.

Sjá myndasafnið hér á eftir! Þar eru ýmsar myndir frá flugsýningunni